ಮುಂಗಾರು ಸೃಷ್ಟಿ...

ಈ ಮುಂಗಾರು, ಮೋಡ, ತಣ್ಣನೆಯ ಗಾಳಿ

ಅರೆಬರೆ ಬಿಸಿಲಿನ ಚೆಲ್ಲಾಟ...

ಆಹಾ! ಇವೆಲ್ಲ ನಿನ್ನ ಸನಿಹದ ಬಯಕೆಗೆ

ಕಿಚ್ಚು ಹತ್ತಿಸುತ್ತಿವೆ ಗೆಳತಿ.

ಹೂತು ಸಮಾಧಿ ಮಾಡಿದ್ದ ಭಾವನೆ,

ಹಸಿ ಮಣ್ಣಿನ ವಾಸನೆಗೆ ಮೇಲೆದ್ದಿವೆ

ಮತ್ತದೆ ತಾಳದ ವೇದನೆ

ಗರ್ಭಕ್ಕಿಳಿದು ಮಡುಗಟ್ಟಿದೆ

ಒಂದೇ ಸಮನೆ ಹಿಂಸಿಸುತ್ತಿದೆ

ಸಾಕು ಮಾಡಿನ್ನು ಗೆಳತಿ,

ನಿನ್ನ ಸಿಡುಕಿನ ಮುಸುಕಾಟ

ಮೊದಲ ಮಳೆಯ ಘಮಕ್ಕೆ ಮೈಯೊಡ್ಡಿ

ತೋಳಗಲಿಸಿ ಆಲಂಗಿಸಿಬಿಡು

ಹಸಿ ಮೈಯ್ಯ ಬಿಸಿ ಅಪ್ಪುಗೆಯಲಿ

ಬೆರೆತು ಒಂದಾಗೋಣ,

ಮುಂಗಾರು ಸೃಷ್ಟಿಗೆ ನಾಂದಿ ಹಾಡೋಣ!

                                                                                                 -ನಾಗರಾಜ್ ಬಿ. ಏನ್.