ಬಚ್ಚಿಟ್ಟ ಪ್ರೀತಿ...

ಎನ್ನೆದೆಯ ನೆಲದಲ್ಲಿ ನಿನ್ನ ನೆನಪು
ಹೂತು ಸಮಾಧಿಯಾಗಿದೆ
ಎಂದುಕೊಂಡಿದ್ದೆ
ಆದರೆ,
ಈ ಹಾಳು ಮಳೆ
ಹೃದಯವನ್ನೆ ಒದ್ದೆ ಮಾಡಿ
ನೆನಪನ್ನು ಮೆಲ್ಲನೆ ಚಿಗುರೊಡೆಸುತ್ತಿದೆ
ಹಸಿಮಣ್ಣ ಸೀಳಿ ಗರಿಕೆ ಮೇಲೆದ್ದಂತೆ
ಹಸಿರೆಲೆಯ ಮೇಲೆ ಇಬ್ಬನಿ ಬಿದ್ದಂತೆ
ಮೂಟೆಕಟ್ಟಿ ಮಣ್ಣಾಗಿಸಿದ ಭಾವ
ಸದ್ದಿಲ್ಲದೆ ತಲೆ ಎತ್ತಿದೆ ಸುರಿವ ಜಡಿಮಳೆಗೆ
ಮತ್ತೆ ಹೃದಯಂಗಳದಲ್ಲಿ,
ಹಸಿರು ಚಪ್ಪರದ ಸಾಲು ಮೆರವಣಿಗೆ
ಮುಂಜಾನೆ ಇಬ್ಬನಿಯ ಮುತ್ತಿನ ಮಾಲೆ
ಹುಣ್ಣಿಮೆ ಶರಧಿಯ ಭೋರ್ಗರೆವ ನರ್ತನ
ಏಳು ಸ್ವರಗಳ ಇಂಪಾದ ನಾದ ನಿನಾದ
ಬೆಚ್ಚನೆಯ ಉಸಿರಲ್ಲಿ ಕಾಲ್ಗೆಜ್ಜೆಯ ಸದ್ದು...

                                                         ಗೆಳತಿ,

ಮೋಡದ ಬಾನಿಗೆ ಎದೆ ಬಾಯಾನಿಸಿದೆ
ವರ್ಷೆಯ ಸ್ಪರ್ಶಕ್ಕೆ ಮನ ಹಸಿಯಾಗಿದೆ
ಹೂತಿಟ್ಟಿದ್ದೇನೆಂದು ಭ್ರಮಿಸಿದ ಪ್ರೀತಿ
ಬಚ್ಚಿಟ್ಟದ್ದೆಂದು ತೋಯ್ದು ಬೆತ್ತಲಾಗಿದೆ!
                                                - ನಾಗರಾಜ್ ಬಿ.ಎನ್.